شرمولا
Kovareke Wêjeyî, çandî, Werzane ye

Çar bira – Luqman Silêman

0 212

Çar bira

Endazyarên çandinîyê ne
Ebdilîlahê Amedî.
Ebdilcebarê Mihabadî.
Ebdilîlahê Hewlêrî.
Ebdilqudûsê Qamişlokî.

Piştî ku her çaran xwendina xwe bi dawî kirin, ji hev re gotin ka em vê Buharê ji xwe re derkevin seyranekê. Buhar xweş xuya dike berîya ku em herin malên xwe mane vaye me xwendina xwe bi dawî kir, dibe ku çend salên din em nikaribin hev bibînin.
Vegerîyan hatin malên xwe dema ku buhar bi riwekî geş bi ser wan de hat xwe karkirin berê xwe dan seyranê, di rê de li zevîyek erd rast hatin, şîn dike mirov guneh dike lê meyzênê, serdîyê simbila wî bostekê dirêj bûye, didê noqa zilama.. Herçar li ber zad sekinîn Ebdilîlahê Amedî dihna xwe dayê çend gavan ber bi zad ve çû beşişî ji û wan re got: Ev genim Îtalî ye, dîyar e wê verêja wî pir baş be, ez bawer im wê xwedîyê wî di genim de bimîne îsal!
Ebdilqudûsê Qamişlokî yekser got: Rast e, ez jî dibêjim ev genim Îtalî ye û pir baş xuya dike.
Ebdilîlahê Hewlêrî di ber xwede kenî, lê nehişt ku Ebdilîlahê Amedî li wî bîne der ku ew kenîye.. serê xwe rakir ji wan re got: Rast e, ez jî dibêjim wê verêja vî genimî pir baş be, lê ev genim ne Îtalî ye, ev genim Meksîkî ye!
Ebdilqudûsê Qamişlokî ji wî re jî got: Belê rast e, ez jî dibêjim ev genim Meksîkî ye û verêja wî pir baş xuya dike.
Ebdilîlahê Amedî pir tengijî, rûyê wî tevlîhevbû ji xwe re got: Çawe dibêje ev genim ne Îtalîye, lê deynekir.
Ebdilcebarê Mihabadî bi qasî mirov hilmekê li çixara xwe bide ma sekinî li genim meyzand, ji wan re got: Ez bi we re me, wê verêja vî genimî pir baş be, wê xwedîyê wî di genim de bimîne, lê ev genim ne Meksîkî ye û ne jî Îtalî ye, ev genim Emêrkî ye, ji simbila wî xuya ye ma hûn genim ji hev nasnakin?
Herdû Ebdilîlahan di zikê xwede tengijîn aciz bûn, rûyê wan sor û şîn bû zimanê xwe gezkirin, lê deynekirin.
Ebdilqudûsê Qamişlokî ji xwe re li wan meyzand wek ku di dilê xwe de bikene, lê nediwêrî li xwe bîne der?
Hersê bira her yek di dilê xwe de, ji hev tengijîn, lê kesî deynekir bi qasî mirov bijmêrê ta bi dehan.
Ebdilîlahê Amedî ji Ebdilqudûsê Qamişlokî re got: Te ji min re got; weke te ye genim Îtalîye û te ji Ebdilîlahê Hewlêrî re got: Weke te ye genim Meksîkîye, lê te ji Ebdilcebarê Mihabadî re ne got: wek te ye û ne te got: Ka ev genim çî ye ka tu jî ji me re bêje ka ev genim çi ye?
Ebdilqudûsê Qamişlokî serê xwe berda ber xwe deynekir her sê ketin gewrîya hev her yek ma li ser ya xwe, ew dibêjê Îtalîyî ye, yê din dibêjê Meksîkî yê û yê dîtir dibêje; na Emêrkî ye.. Dengê xwe li hev bilind kirin gotin motinê ne di rê de dane rûyê hev, çavên xwe li dora xwe gerandin lê erdekî ripî rût e tiştek lê xuyanake.. Hino hino ji hev çûne paş kara xwe û şer kirin çavên xwe li dora xwe li bervir meviran gerandin, ew erdê berîya kêlîkekê, ji dermana re zixorek jî lê xuya nedikir wek ku kevir ji ezmana barî bin dora wan tev bûne kevir? keysa xwe li şer xweş kirin xwe tewandin keviran li ber hev pehin bûn berîya ku keviran deynin hev Zilamek ji nav zad derket dengê xwe li wan kir ev hûn çi dikin, ji wan re got: Çi bela we ye gelî camêran?
Dema ku dengê zilam kirin, di cihê xwe de mane sekinî kevirên xwe di ber xwe re berdan. Jêre gotin: Ev zad ê te ye?
Zilam got: Belê, zadê min e, çima?
Her çaran bi hev re gotin em li ser genimê te li hev nakin!
Dema ku gotin em li ser genimê te li hev nakin, zilam kenîya, ji wan re got: De ka bêjin çima hûn li hev nakin?
Ebdilîlahê Amedî got: Xalo, ma genimê te ne Îtalîye?
Berîya xwedîyê genim bersiva wî bide Ebdilqudûsê Qamişlokî got: Erê xalo ez jî dibêjim genimê te Îtalî ye.
Zilam got: Na xwarzê, genimê min ne Îtalî ye?
Keyfa Ebdilîlahê Hewlêrî û Ebdilcebarê Mihabadî hat, di bin simbêlên xwe de beşişîn.
Ebdilîlahê Amedî xwe bi ser hev de qermiçand rûyê wî tirş û tehil bû, çavên wî çûne pişta guhên wî deynekir.
Ebdilîlahê Hewlêrî got: Min ji wan re digot; ev genim Mesîkî ye, lê bîya min ne dikirin.
Cardî Ebdilqudûsê Qamişlokî got: Belê xalo ez dibêjim genimê te Meksîkî ye ne?
Zilam ji wî re jî got: Na xwarzê, genimê min ne Meksîkî ye.
Rûyê Ebdilîlahê Hewlêrî reş qelîya, pê re rûyê Ebdilîlahê Amedî vebû, lê keyfa Ebdilcebarê Mihabadî hat.
Ebdilcebar ji wan re got: Min ji were ne got; geminê xalê min Emêrkî ye, we kenê xwe bi min dikir. Ne xalo mane genimê te Emêrkî ye?
Cardin Ebdilqodûsê Qamişlokî xwe avêt gotinê ji zilam re got: Min dizanî genimê xalê min Emêrkî ye ne xalo?
Zilam got: Na bavê xalo, genimê min ne Emêrîkî ye.
Herçaran li hev meyzand û ji xalo re gotin: Ev tu kenê xwe bi me dikî?
Zilam bi dengekî bilind kenî, ji wan re got: Na, ez kenê xwe bi we nakim, lê dîyar e hûn kenê xwe bi xwe dikin. Ev ne genim e bavê xalo, ev cehe ma hûn ceh û genim ji hev nas nakin endazyarno. Ma ne we li zankoyê pênc şeş salan li ser çandinîyê xwendîye!!?

Leave A Reply

Your email address will not be published.