شرمولا
Kovareke Wêjeyî, çandî, Werzane ye

Zarokatî Jîyan e Jîyanê Mekujin- Hind Ebdelo

0 140

Xweda û zarok yek in. Kesê ku zarokan dikuje ew xwedayê xwe jî dikuje. Kesê ku zarokan diparêze ew xwedayê xwe jî diparêze. Xweda heger şad dibe kenê xwe di rûyê zarokan re dîyar dike. Lê heger ew xemgîn dibe rondikên xwe di çavên zarokan re dibarîne. Xweda û zarok hevcêwî ne lewma divê ew jî bi pîrozîya Xweda bin. Rindê hertim ev gotin li pêş herdu zarokên xwe digotin. Tevî ku herdu zarokan pir ji gotinên wê tênedigihîştin, lê ew şad dibûn dema ku didîtin dîya wan bi van gotinan şad dibe. Rêdûr hevjînê Rindê, şervan bû, di Berxwedana Serdemê de jîyana xwe ji dest dabû. Piştî dagirkirina Efrînê. Rindê herdu zarokên xwe rakirin û berê xwe da herêma Şahbayê û li gundê Tilrifetê bi cih bû .

Rojekê ji rojên koçberîyê kurê Rindê yê dehsalî hat rêdan jê xwest û got: Dayê zarok li kolanê dilîzin, bihêle ku ez û birayê xwe yê piçûk jî biçin bi wan re bi gogê bilîzin.

Rindê dît ku zarokan pir meraq kirine bi gogê bilîzin. Wê li heyamê nêhirî û dema dît ku heyam xweş e û roj hilatîye, wê rêdan da wan û ji wan re got: Biçin tev zarokan bilîzin.

Herdu zarok çûn li kolanê bilîzin. Rindê jî, pincarên ku duh ji çolê berhev kiribû hûr dikir, di ber hûrkirina pincarê re kêr li tilîya wê ya mezin ket û ew hate birrîn. Bi vê birînê re dilê Rindê pir lê da mîna ku ew dixweze hişyarîyekê bide wê, lê wê nizanî ku ew dixweze çi jê re bibêje. Ji dest nehêminîya dil, wê hûrkirina pincarê rawestand. Rabû ser xwe û ber bi derîyê malê ve çû. Derî vekir da ku li zarokên xwe temaşe bike. Wê dît ku li pêş mala cîranên wan deh zarok kom bûne û ew yarîgehekê ji xwe re çêdikin da ku tê de bi gogê bilîzin. Dema yarîgeh amade kirin. Êdî dest bi dîyarkirina herdu tîman kirin. Kurê wê yê mezin kete nav tîmekê û yê piçûk kete nav tîma din. Ango tîmên herdu birayan li dijberî hev bûn.

Bi dîyarkirina tîman re dest bi lîstinê kirin. Destpêkê tîma mezin xwest ku gog li ba wan be û ew lîstinê dest pê bikin. Herweha tîma piçûk jî xwest gog li ba wan be û ew lîstinê dest pê bikin. Di nav vê nelihevkirinê de gog di navbera herdu tîman de sêwî mabû. Wê nizanî ku kîjan tîm wê despêkê pê bilîze. Dema Rindê dît ku ji dest nelihevkirinê dê lîstina wan berî dest pê bike têk biçe, wê derî girt û ber bi wan zarokan ve çû da ku herdu tîman li hev bîne, ji bo dest bi lîstina xwe bikin. Rindê hîn çend gav navêtibûn ji nişkav ve dengekî mîna birqan bi ezmên ket. Li pêş çavên Rindê bû toz û telaz û li ser erdê kete xwarê. Mîna koran di nav wê tozê de rabû ser xwe û meşî, li tiştekî likumî û kete erdê

Rindê bi destê xwe ew tiştê lê velikumî peland û kire nav destê xwe. Ew tişt gilover bû. Wê di dilê xwe de got: Ev goga zarokan e. Helbet wan li hev nekir lewma gog avêtin vir. Wê gog rakir û rabû ser xwe hingê toz vekişî û wê dît ku tiştê di destê wê de ne gog e, lê serê kurê wê yê piçûk e. Ji dil de wê qîr kir û serê zarokê xwe hembêz kir. Mirov giş li cihê teqînê kom bûn û perçeyên laşên zarokan berhev kirin. Jineke ku li nêz Rindê bû wê bangî Rindê kir û got: Rindê were binêre lawê te yê mezin di nav xwîna xwe de maye.

Weke dînên ku hişê wan ne li serê wan e. Wê serê kurê xwe yê piçûk kire hembêza xwe û berve lawê xwe yê mezin ve xuşî. Laşê lawê xwe yê mezin bi destekî hembêz kir û di destê din de serê lawê xwe yê piçûk hembêz kir. Dagirî û li ser herduyan lorand û got:

Razin Xwedayên min razin

Xewên şêrîn bibînin

Lîstokên xweş li buhiştê bi bavê xwe re bilîzin

Li pey xwe dîya xwe mehêlin

Razin Xwedayên min razin

Min bi tenê mehêlin

Werin dîya xwe jî bi xwe re bibin

Rindê qêrînek bilind ji gewrîya xwe berda û bi ser  laşên zarokên xwe de ket û nema livî.

 

Leave A Reply

Your email address will not be published.